खम्मा खम्मा रामदेव पीर लिरिक्स Khama Khama Ramdev Peer Lyrics,

खम्मा खम्मा ओ रामापीर अवतारी।
कळजुग में महिमा थारी भारी जी,
महिमा भारी जी,रामापीर अवतारी।

गजानन जी साय करीजो,
सादर शीश नवावा जी।
बाबा रा चौबीस परचा,
जग ने गाय सुनावा जी।
बाबा बड़ो है उपकारी जी।
ओ म्हारो, बाबो बड़ो है उपकारी जी,
रामापीर अवतारी।
खम्मा खम्मा ओ रामापीर अवतारी।

पेहलो परचों रामदेव जी,
अजमल जी दिनों जी।
कुंकु पगल्या आंगण मांड्या,
पाणी दूध कीनो जी।
हो सांवरा, पालनीय पगटया मुरारी जी,
रामापीर अवतारी।
खम्मा खम्मा ओ रामापीर अवतारी।

दूजो परचों मेणा दे ने,
रामदेव दिखलायो जी।
दूध उफ़णतो चरु मायने,
झालो देय ढबायो जी।
हो बाबा, मेटी माता री शंका सारी जी,
रामापीर अवतारी।
खम्मा खम्मा ओ रामापीर अवतारी।

तीजो परचों रामदेव,
दरजी ने दिखलावै जी।
कपडे रो घोड़लियो बाबो,
पकड़ लगाम उड़ावै जी
बाबे री, बालपने री लीला न्यारी जी,
रामापीर अवतारी।
खम्मा खम्मा ओ रामापीर अवतारी।

चौथे परचे रामदेव जी,
भैरव रागस मारयो जी।
धरती पर सु बोझ पाप रो,
बाबो आप उतारयो जी।
हो म्हारे, बाबा ने पूजे नर नारी जी,
रामापीर अवतारी।
खम्मा खम्मा ओ रामापीर अवतारी।

पांचवो तो परचों खाती,
सारथीया ने दिनों जी।
मरियोडा रा हाथ पकड़कर,
जीवनदान दिनों जी।
बाबा पर, सारथियो जावै बलिहारी जी,
रामापीर अवतारी।
खम्मा खम्मा ओ रामापीर अवतारी।

छठे परचे बाण्यो बोयतो,
थाने अरज गुजारी जी।
जहाज डूबती मझधारा में,
भुजा पसार तारी जी।
भगता री, मेटी थे विपदा भारी जी,
रामापीर अवतारी।
खम्मा खम्मा ओ रामापीर अवतारी।

सातवो तो परचों लख्खी,
बिणजारा ने दिनों जी।
झूठ बोलियों रामदेव जी,
मिसरी लूण कीनो जी।
बिणजारो रो आयो शरण में तिहारी जी,
रामापीर अवतारी।
खम्मा खम्मा ओ रामापीर अवतारी।

आठवो परचों तो पांचू,
पीरा ने दिखलावै जी।
मक्का सु भोजन रा कटोरा,
पल में आप मंगावै जी।
ओ बाबा, पीरा में पदवी भारी जी,
रामापीर अवतारी।
खम्मा खम्मा ओ रामापीर अवतारी।

नवै परचे रामदेव जी,
रण में शंख बजायो जी।
पूंगलगढ़ में पड़ियारा रो,
झूठो गरब मिटायो जी।
हो बाबा, सुगणा ने दुखड़ा से उबारी जी,
रामापीर अवतारी।
खम्मा खम्मा ओ रामापीर अवतारी।

दशवै परचे नेतल दे ने,
परचों पीर दिखावै जी।
पगा पांगली नेतल दे ने,
फेरा माय चलावै जी।
हो राणी, नेतल दे लक्मी अवतारी जी,
रामापीर अवतारी।
खम्मा खम्मा ओ रामापीर अवतारी।

नेतल दे री सहेलिया ने,
परचों है दिखलावै जी।
कंवर कलेवो करवा बाबो,
जद महल में आवै जी।
बाबा री, ग्यारवा परचा री लीला न्यारी जी,
रामापीर अवतारी।
खम्मा खम्मा ओ रामापीर अवतारी।

मरियोड़ी मित्री ने सखियाँ,
थाली माहि रखावै जी।
थाली पर सु परदो बाबो,
पल में आप उठावै जी।
मंजारी, जीवत वै मिनकी भागी जी,
रामापीर अवतारी।
खम्मा खम्मा ओ रामापीर अवतारी।

बारहवो परचों तो बाबो,
भाणुडा ने दिनों जी।
सुगणा बाई रो लाल लाडको,
जिण ने जीवत कीनो जी।
हो बीरा, आरती उतारे बहना थारी जी,
रामापीर अवतारी।
खम्मा खम्मा ओ रामापीर अवतारी।

तेहरवो परचों तो बाबो,
बिरमदेव ने दिनों जी।
गाय रो बाछडियो मर गयो,
जिण ने जीवन कीनो जी।
बाबा रो, सोवन चुटियो है चमत्कारी जी,
रामापीर अवतारी।
खम्मा खम्मा ओ रामापीर अवतारी।

चोदहवो पर्चा नेतल ने,
रामदेव दिखलावै जी।
गर्भ में साधो है बालक,
जिणरी बोली सुनावै जी।
हो बाबा, साँचा है सिद्ध अवतारी जी,
रामापीर अवतारी।
खम्मा खम्मा ओ रामापीर अवतारी।

पन्द्रहवों परचों हड़बूजी,
सांखला ने दिनों जी।
जीवित समाधि लिया पछे भी,
रतन कटोरो दिनों जी।
बाबा ने, जाणे है दुनिया सारी जी,
रामापीर अवतारी।
खम्मा खम्मा ओ रामापीर अवतारी।

सोलहवो परचों धनिया सु,
रावलमल दे पायो जी।
जम्मो जगाकर आई रूपा,
थाली में बाग़ लगायो जी।
हो बाबा, राणी रूपा दे भगत थारी जी,
रामापीर अवतारी।
खम्मा खम्मा हो रामापीर अवतारी।

सत्तरवैं परचे में जरदो,
जाति बलाई वालो जी।
बारहा बरस तक ऊभो रियो,
लीले रो रखवाळी जी।
हो बाबा, सूखे कंकाल जान डाली जी,
रामापीर अवतारी।
खम्मा खम्मा हो रामापीर अवतारी।

महाराणा कुम्भाजी परचों,
अठारहवो है पायो जी।
मुगला सु मेवाड़ी राणो,
जंग जीतकर आयो जी।
ओ कुम्भा, बाबा री महिमा बखाणी जी,
रामापीर अवतारी।
खम्मा खम्मा हो रामापीर अवतारी।

उन्निसवो परचों तो बाबो,
दल्ला सेठ ने दिनों जी।
शीश जोड़कर धड़ सु बाबो,
जीवनदान दिनों जी।
हो बाबे, चोटी री राखी सेलानी जी,
रामापीर अवतारी।
खम्मा खम्मा हो रामापीर अवतारी।

बिसवो परचों तो आंधो,
साधु सिरोही पावै जी।
रामदेव ने याद करे जद,
आंखड़ल्या खुल जावै जी।
बाबे री, सेवा में बीती उमर सारी जी,
रामापीर अवतारी।
खम्मा खम्मा हो रामापीर।

इक्किसवो परचों है भारी,
हरजी भाटी पावै जी।
अण ब्याही बकरी रा थन सु,
दूध काढ़कर लावै जी।
हो बाबे, दूध पियो है अवतारी जी,
रामापीर अवतारी।
खम्मा खम्मा हो रामापीर अवतारी।

बाइसवो परचों तो राजा,
विजयसिंह जी पावै जी।
कपड़ा रा घोडा ने बाबो,
दाणो आप खिलावै जी।
बाबा ने, नमिया है हाकम हजारी जी,
रामापीर अवतारी।
खम्मा खम्मा हो रामापीर अवतारी।

नवलसिंह जी नरेश परचों,
तेइसवो है पावै जी।
कैद किया जयपुर का राजा,
बाबो मुक्त करावै जी।
ओ राजा, पावै वै पाछी जागीरी जी,
रामापीर अवतारी।
खम्मा खम्मा हो रामापीर अवतारी।

माता आसरी बाई परचों,
चौबिसवो है पायो जी।
धूपदान और चिमटों देखो,
बाबा सु है पायो जी।
बाबा री, भगती में उमर गुजारी जी,
रामापीर अवतारी।
खम्मा खम्मा हो रामापीर अवतारी।

है चौबीस प्रमाण आपरा,
ज्योरा नाम बतावा जी।
भूल चूक होवै तो बाबा,
थासु माफ़ी चावा जी।
हो बाबा, गलती बगसावो थे तो म्हारी जी,
रामापीर अवतारी।
खम्मा खम्मा हो रामापीर अवतारी।

पेलो गुरु प्रमाण और दूजो,
निज प्रमाण कहलावै जी।
सोजी प्रमाण तीसरो चोथो,
महापद है बतलावैं जी।
हो बाबा, पांचवो आगम प्रमाण जाणी जी,
रामापीर अवतारी।
खम्मा खम्मा हो रामापीर अवतारी।

छठो आगम प्रमाण दुसरो,
मुगती प्रमाण सातवो जी।
आठवो निज प्रमाण,
नमो पिंड आपरो जी।
हो बाबा, देशवो है निकलक नेजाधारी जी,
रामापीर अवतारी।
खम्मा खम्मा हो रामापीर अवतारी।

ग्यारहवो है निजार बाबा,
अभय प्रमाण बारहवो जी।
योग प्रमाण तेरहवो दाता,
भक्ति प्रमाण चौदहवो जी।
हो बाबा, पन्द्रहवों ज्ञान गुणकारी जी,
रामापीर अवतारी।
खम्मा खम्मा हो रामापीर अवतारी।

माया प्रमाण सोलहवीं वाणी,
मूल आरम्भ सत्तरहवो जी।
भाव प्रमाण अठारहवो है,
है अवतार उन्निसवो जी।
हो बाबा, बिसवा में महिमा बखाणी जी,
रामापीर अवतारी।
खम्मा खम्मा हो रामापीर अवतारी।

रज प्रमाण इक्किसवो बाबा,
बाईस अन्न प्रमाण जी।
तेइसवो है साखी बाबा,
चौबीस बीज प्रमाण जी।
हो बाबा, जाणे है ज्यां ने दुनिया सारी जी,
रामापीर अवतारी।
खम्मा खम्मा हो रामापीर अवतारी।

अजमल घर अवतार बापजी,
आप गुणा री खान जी।
में तो हु अज्ञानी बालक,
किनविध करू बखाण जी।
हो बाबा, मंदमति है बाबा म्हारी जी,
रामापीर अवतारी।
खम्मा खम्मा हो रामापीर अवतारी।

लीले रा असवार आपरी,
महिमा अपरम्पार जी।
मास भादवै गांव रूणीचे,
होवै जय जयकार जी।
हो बाबा, दर्शन ने आवै नर नारी जी,
रामापीर अवतारी।
खम्मा खम्मा हो रामापीर अवतारी।

रामदेव बाबा री कीरत,
दास अशोक सुनावै जी।
चरणा री सेवा में लीजो,
चरणा में सुख पावै जी।
हो रामा, अरज सुणीजो बाबा म्हारी जी,
रामापीर अवतारी।
खम्मा खम्मा हो रामापीर अवतारी।