आवति श्री वृषभानु दुलारी भजन

आवति श्री वृषभानु दुलारी भजन

आवति श्रीवृषभानुदुलारी।
रूप राशि अति चतुर शिरोमणि-
अंग अंग सुकुमारी।।
प्रथम उबटि मज्जन करि सज्जित-
नील बरन तन सारी।
गुँथित अलक तिलक कृत सुन्दर-
सेंदुर माँग सँबारी।।
मृगज समान नैंन अंजन युत-
रुचिर रेख अनुसारी।
जटित लवंग ललित नाशा पर-
दशनावलि कृतकारी।।
श्रीफल उरज कसूँभी कंचुकी कसि-
ऊपरि हार छबि न्यारी।
कृश कटि उर गंभीर नाभिपुट
जघन नितम्बनि भारी।।
मनौं मृणा भूषण भूषित भुज-
श्याम अंस पर डारी।
जय श्रीहित हरिवंश युगल करणी गज-
बिहरत वन पिय प्यारी।।