नामोकी बलहारी गजगणिका तारी ॥ध्रु०॥
गणिका तारी अजामेळ उद्धरी । तारी गौतमकी नारी ॥१॥
झुटे बेर भिल्लणीके खावे । कुबजा नार उद्धारी ॥२॥
मीरा कहे प्रभु गिरिधर नागर । चरणकमल बलिहारी ॥३॥

जोगी मेरो सांवळा कांहीं गवोरी ॥ध्रु०॥
न जानु हार गवो न जानु पार गवो । न जानुं जमुनामें डुब गवोरी ॥१॥
ईत गोकुल उत मथुरानगरी । बीच जमुनामो बही गवोरी ॥२॥
मीरा कहे प्रभु गिरिधर नागर । चरनकमल चित्त हार गवोरी ॥३॥

लक्ष्मण धीरे चलो मैं हारी ॥ध्रु०॥
रामलक्ष्मण दोनों भीतर । बीचमें सीता प्यारी ॥१॥
चलत चलत मोहे छाली पड गये । तुम जीते मैं हारी ॥२॥
मीरा कहे प्रभु गिरिधर नागर । चरणकमल बलिहारी ॥३॥

प्रभु तुम कैसे दीनदयाळ ॥ध्रु०॥
मथुरा नगरीमों राज करत है बैठे । नंदके लाल ॥१॥
भक्तनके दुःख जानत नहीं । खेले गोपी गवाल ॥२॥
मीरा कहे प्रभू गिरिधर नागर । भक्तनके प्रतिपाल ॥३॥