तेरी भंगिया के हाथ मैं ना लाऊँ

तेरी भंगिया के हाथ मैं ना लाऊँ ओ भोले भजन

तेरी भंगिया की करूँ ना घुटाई भोले जी
मेरी करता ना बिलकुल सुनाई भोले जी,
आज माचैगा रोला भंग घोटू ना तौला,
या खोलकै  नै साफ़ मैं बताऊँ ओ भोले,
तेरा फोड़ूंगी लोटा तोडू कुण्डी यो सोटा,
तेरी भंगिया के हाथ मैं ना लाऊँ ओ भोले,

जब सामण का महीना आवै,
भांग ने मेरा मन ललचावै,
नहीं भांग तै सारै भोले,
साथ चिलम के सूट्टे लावै,
कर भंगिया पै गौर घणी बनै ना कठोर,
दिखे ठीक नहीं घर मैं ये करने रोले,
तेरा फोड़ूंगी लोटा तोडू कुण्डी यो सोटा,
तेरी भंगिया के हाथ मैं ना लाऊँ ओ भोले।

भांग घोट दे गोरा प्यारी,
मनै बता क्यों देर लगारी,
रोज रोज तेरा भांग का पीणा,
ठीक नहीं भोले भंडारी,
मेरी सुन गोरा नार मत करै तकरार,
मेरै पीकै नै भांग आगे सिर मैं धोले,
तेरा फोड़ूंगी लोटा तोडू कुण्डी यो सोटा,
तेरी भंगिया के हाथ मैं ना लाऊँ ओ भोले।

भांग पीण तै नाटै मतना,
गोरा नखरे छाटै मतना,
खत्म हो गयी भांग ओ भोले,
ज्यादा चक्कर काटै मतना,
गोरा आज की सै  बात मेरी कटती ना रात,
कल भीम सैन ले आवैगा भर कै झोले,
तेरा फोड़ूंगी लोटा तोडू कुण्डी यो सोटा,
तेरी भंगिया के हाथ मैं ना लाऊँ ओ भोले।